గిల్ జిల్ జిగేల్
== డబుల్ సెంచరీతో రికార్డుల మోత
== కళ్లు చెదిరే షాట్లతో హైదరాబాద్‌ వాసుల జోష్‌
హైదరాబాద్‌,జనవరి18(విజయంన్యూస్):
భారత యువ క్రికెటర్ శుభమన్‌ గిల్ అద్భుత ఆటతీరుతో జిల్ జిగేల్ అనిపించాడు.. భారీ షాట్లతో విరుచుకపడిన గిల్ డబుల్ సెంచరీ చేశాడు.. ఒక్క మ్యాచ్‌తో రికార్డుల విూద రికార్డులు రాసుకున్నాడు. సెంచరీ కాదు..ఏకంగా డబుల సెంచరీ సాధించి హైదరాబాద్‌ వాసులను తన్మయం చెందేలా చేశాడు. 149 బంతుల్లో 19 ఫోర్లు, 9 సిక్స్‌లతో 208 పరుగులు చేశారు. ఔరా అని అంతా ఆశ్చర్యపోయారు. టీమిండియా ఓపెనర్‌ 150 పరుగులు పూర్తి చేసుకున్న తీరు, 200 పరుగులు సాధించిన సమయంలో వినిపించిన అభిమాన హోరు హైదరాబాద్‌ మ్యాచ్‌కే హైలైట్‌గా నిలిచాయి.
ఇది కూడా చదవండి: ‘ఖమ్మం గుమ్మం’ గులాబీ మయం
147 పరుగుల వద్ద సిక్స్‌ కొట్టి 150 పరుగులు పూర్తి చేసుకున్నాడంటే గిల్ దంచుడు ఎలా ఉందో ప్రత్యేకంగా చెప్పనక్కర్లేదు. 48వ ఓవర్‌లో 188 పరుగుల వ్యక్తిగత స్కోర్‌ వద్ద వరుసగా హ్యాట్రిక్‌ సిక్సులు కొట్టి 200 పరుగుల మైలురాయిని చేరాడు. గిల్ 208 పరుగుల వ్యక్తిగత స్కోర్‌ వద్ద షిప్లే బౌలింగ్‌లో షాట్‌కు యత్నించి ఫిలిప్స్‌కు క్యాచ్‌గా చిక్కి ఔట్‌ అయ్యాడు. కానీ.. హైదరాబాద్‌ వేదికగా గిల్(208) ఆడిన ఇన్నింగ్స్‌ మాత్రం చరిత్రలో నిలిచిపోతుంది. గిల్ దంచుడుతో టీమిండియా నిర్ణీత 50 ఓవర్లలో 8 వికెట్ల నష్టానికి 349 పరుగులు చేసింది. టీమిండియా ఓపెనర్‌ రోహిత్‌ శర్మ (34), విరాట్‌ కోహ్లీ (8), ఇషాన్‌ కిషన్‌ (5), సూర్యకుమార్‌ యాదవ్‌(31), హార్థిక్‌ పాండ్యా(28), వాషింగ్టన్‌ సుందర్‌ (12) పరుగులు చేసి ఔట్‌ కాగా.. గిల్ ఒక్కడే 208 పరుగులు చేసి న్యూజిలాండ్‌ బౌలర్ల పాలిట మాన్‌స్టర్‌గా నిలిచాడు. వన్డేల్లో 23 ఏళ్ల అతి తక్కువ వయసులో డబుల్ సెంచరీతో గర్జించిన తొలి టీమిండియా ఆటగాడిగా, డబుల్ సెంచరీ సాధించిన ఐదో టీమిండియా బ్యాట్స్‌మెన్‌గా గిల్ చరిత్ర సృష్టించాడు. అంతేకాదు.. న్యూజిలాండ్‌ జట్టుపైన అత్యధిక వ్యక్తిగత స్కోర్‌ (208) సాధించిన ఆటగాడిగా కూడా గిల్ నిలవడం విశేషం.