మాదక ద్రవ్యాల అక్రమ రవాణాను అరికట్టడంలో చర్యలు తీసుకోవాలి: కలెక్టర్

 మాదక ద్రవ్యాల అక్రమ రవాణాను అరికట్టడంలో పటిష్ట చర్యలు చేపట్టాలని జిల్లా కలెక్టర్‌ వీపీ గౌతమ్‌ అన్నారు. మాదక ద్రవ్యాల వినియోగం, సరఫరా నియంత్రించేందుకు జిల్లా స్ధాయి నార్కోటిక్స్‌ కో-ఆర్డినేషన్‌ కమిటీ సమావేశం నూతన కలెక్టరేట్ లోని సమావేశ మందిరంలో శనివారం జిల్లా కలెక్టర్‌, పోలీస్ కమీషనర్ విష్ణు ఎస్. వారియర్ తో కలిసి నిర్వహించారు.  ఈ సందర్భంగా ఆయన మాట్లాడుతూ, మాదక ద్రవ్యాల సరఫరా మూలాలకు సంబంధించిన అన్ని అనుసంధానాలను గుర్తించి కట్టడి చేయడం వల్ల లక్ష్యాన్ని చేరుకోవడానికి వీలవుతుందని అన్నారు. ఇందుకు అధికారుల సమిష్టి కృషి, స్థానిక ప్రజల మధ్య సమన్వయం ఉండాలని ఆయన అన్నారు. జిల్లా స్థాయిలో సమాచార వ్యవస్థను పటిష్టం చేయడం ద్వారా మాదక ద్రవ్యాల రవాణాపై స్పష్టమైన సమాచారం అందుతుందన్నారు. దీని ఆధారంగా సమస్య పరిష్కారానికి ప్రణాళిక రూపొందించడానికి వీలవుతుందన్నారు. మాదక ద్రవ్యాల వినియోగం పెరిగితే ప్రజారోగ్యానికి ప్రమాదకరంగా మారుతోందన్నారు.

ఇది కూడా చదవండి: రేపు జిల్లాకు తుమ్మల రాకా

మాదక ద్రవ్యాల వల్ల కలిగే నష్టాల గురించి విద్యాలయాల్లో విస్తృతంగా అవగాహన కార్యక్రమాలను నిర్వహించాలని ఆయన అన్నారు. తల్లిదండ్రులు సైతం తమ పిల్లలను ఒక కంట కనిపెడుతూ ఉండాలన్నారు. మాదక ద్రవ్యాలు అలవాటు పడిన వారిని రిహాబిలిటేషన్‌ సైకాలజిస్ట్‌, ఫ్యామిలీ కౌన్సిలింగ్‌ ద్వారా మార్పు తీసుకొని రావాలన్నారు.
సమావేశంలో పోలీస్‌ కమిషనర్‌ విష్ణు ఎస్. వారియర్‌ మాట్లాడుతూ, సరదా కోసం సిగరెట్‌తో మొదలవుతున్న యువత వ్యసనాలు, మద్యం, ఆ తరువాత మాదక ద్రవ్యాల వరకు వెళ్తుందన్నారు. మాదక ద్రవ్యాల వినియోగాన్ని కట్టడి చేయకుంటే భవిష్యత్తులో సమాజంపై తీవ్ర దుష్ప్రబావం చూపుతుందని అన్నారు. మత్తుకు బానిసగా మారిన యువతను టార్గెట్‌ చేసుకున్న గంజాయి మాఫియా, చివరకు వారినే ఏజెంట్లుగా మార్చి వ్యాపారాన్ని చాపకింద నీరులా విస్తరింపజేయ ప్రయత్నం చేస్తున్నారని అన్నారు. మత్తు పదార్థాలకు బానిసలై వారు సామాజిక సంబంధాలను సైతం కోల్పోతున్నారని, తరచూ ఉద్రేకానికి లోనవుతూ, నేరాలకు పాల్పడుతున్నారని అన్నారు. జిల్లాలో కల్టీవేషన్ ప్రాంతాలు లేవని ఆయన అన్నారు. ఈ సంవత్సరం ఇప్పటి వరకు 20 కేసులు, 38 మంది వ్యక్తులపై నమోదు చేసి, రూ. 62 లక్షల విలువైన 531 కిలోల గంజాయిని సీజ్ చేసినట్లు ఆయన అన్నారు. గట్టి నిఘాపెట్టి పూర్తిగా నియంత్రిస్తామని సిపి తెలిపారు.

ఇది కూడా చదవండి: జర్నలిస్టుల ఇళ్ల స్థలాలపై ప్రభుత్వానికి చవితి ప్రేమ
ఈ సమావేశంలో అదనపు కలెక్టర్లు బి. సత్యప్రసాద్, డి.  మధుసూదన్‌ నాయక్‌, ఖమ్మం మునిసిపల్ కమీషనర్ ఆదర్శ్ సురభి, అదనపు డిసిపి కే.ఆర్.కె. ప్రసాద్ రావు, జిల్లా ఎక్సైజ్‌ సూపరింటెండెంట్‌ నాగేందర్‌ రెడ్డి, ఆర్డీవోలు, ఏ.సి.పిలు, జిల్లా అధికారులు, తదితరులు పాల్గొన్నారు.